សេចក្តីផ្តើម
ថ្ងៃមួយមានសិស្សជាច្រើនបានមកឡោមព័ទ្ធខ្ញុំជិត ហើយប្រាប់ខ្ញុំឱ្យនិពន្ធសៀវភៅមួយច្បាប់នេះឡើង។ ពួកគេចង់ឱ្យមនុស្សទូទៅបានយក៍ស្នាដៃកិច្ចការរបស់ទៅប្រើជាប្រយោជន៍ធ្វើឱ្យជីវិតពួកគេល្អប្រសើរឡើង។ នោះគឺជាអ្វីដែលខ្ញុំប៉ងធ្វើជាយូរមកហើយ។ ទីបំផុតវាក៏បានក្លាយជាកិច្ចការចម្បងមួយរបស់ខ្ញុំ។
ការងារស្រាវជ្រាវរបស់ខ្ញុំជាផ្នែកមួយនៃដំណើរការខាងចិត្តវិទ្យាដែលគេបានធ្វើជាយូរមកហើយ ដែលបង្ហាញឱ្យឃើញអំពីអំណាចនៃជំនឿរបស់មនុស្ស, អាចជាជំនឿដែលយើងដឹងឬមិនទាន់បានដឹង តែវាជាឥទ្ធិពលយ៉ាងធំធេងមកលើតម្រូវការ និងជាកត្តាកំណត់ថាយើងនឹងអាចសម្រេចជោគជ័យក្នុងការយកវត្ថុនោះមកគ្រប់គ្រងបានឬមិនបានផងដែរ។ ដំណើរការនេះនៅបានបង្ហាញឱ្យឃើញថាការផ្លាស់ប្តូរជំនឿរបស់យើង ទោះបីវាគ្រាន់តែជាជំនឿសាមញ្ញធម្មតាក៏អាចបណ្តាលឱ្យមានផលប៉ះពាល់ខុសគ្នាយ៉ាងធំធេងមហាសាល។
ក្នុងសៀវភៅនេះអ្នកនឹងបានរៀនយល់ដឹងថា ជំនឿដ៏សាមញ្ញធម្មតាមួយចំនួនដែលជាប់ទាក់ទងនឹងរូបអ្នក (ជាជំនឿមួយដែលយើងស្រាវជ្រាវរកឃើញក្នុងការស្រាវជ្រាវរបស់យើង) វាដឹកនាំមួយផ្នែកធំនៃជីវិតរបស់អ្នក។ តាមពិតជំនឿបែបសាមញ្ញទាំងនោះបានជ្រាបចូលទៅដល់ គ្រប់ផ្នែក នៃជីវិតរបស់អ្នក។ ភាគច្រើននៃអ្វីដែលសន្មតថាជាបុគ្គលិកលក្ខណៈរបស់អ្នក វាកកើតឡើងមកពី"ផ្នត់គំនិត"(mindset) នេះឯង។ ភាគច្រើននៃអ្វីដែលជារនាំងអ្នកមិនឱ្យប្រើអស់ពីសក្តានុពលរបស់ខ្លួនគឺដោយសារតែផ្នត់គំនិតនេះ។
តាំងពីដើមមកមិនធ្លាប់មានសៀវភៅណាមួយពន្យល់អំពីផ្នត់គំនិតនេះឬប្រាប់វិធីយកវាមកប្រើជាប្រយោជន៍សម្រាប់ជីវិតនោះទេ។ ការស្វែងយល់អំពីផ្នត់គំនិតដូចដែលបានពោលមកនេះនឹងជួយឱ្យអ្នកបានយល់ពីបណ្តាលបុគ្គលឆ្នើមនានា មិនថាក្នុងវិស័យវិទ្យាសាស្ត្រ សិល្បៈ កីឡា ឬធុរៈកិច្ចព្រមទាំងបានយល់អំពីអ្នកដែលសមគួរនឹងក្លាយជាបុគ្គលឆ្នើម(តែមិនបាន) ផងដែរ។ អ្នកនឹងបានយល់អំពីគូជីវិត ចៅហ្វាយនាយ មិត្តភក្តិ និងកូនៗ, អ្នកនឹងបានចេះពីវិធីយកសក្តានុពលរបស់ខ្លួន រួមទាំងរបស់កូនៗមកប្រើផងដែរ។
ខ្ញុំមានមោទនភាពជាខ្លាំងដែលបានចែករំលែករបបគំហើញរបស់ខ្ញុំអស់លោកអ្នកបានដឹង។ ក្រៅពីរឿងរ៉ាវរបស់បុគ្គលនានានៅក្នុងការស្រាវជ្រាវរបស់ខ្ញុំ, ខ្ញុំនៅបានបន្ថែមខ្លឹមសារទៅក្នុងជំពួកនីមួយៗ ដោយព្រឹត្តិការណ៍ដកស្រង់ចេញពីសារព័ត៌មាន និងបទពិសោធន៍ជីវិតរបស់ខ្លួនឯង ដើម្បីឱ្យអ្នកបានយល់ពីដំណើរការរបស់ផ្នត់គំនិត (ភាគច្រើនខ្ញុំបានកែឈ្មោះនិងព័ត៌មានផ្ទាល់ខ្លួនរបស់ម្ចាស់រឿងដើម្បីរក្សាសិទ្ធិឯកជនរបស់ពួកគេ។ ក្នុងករណីខ្លះខ្ញុំយករឿងរ៉ាវរបស់មនុស្សជាច្រើនមកផ្សំជារឿងតែមួយ ដើម្បីឱ្យអ្នកបានយល់ពីចំណុចគោលដៅនៃបញ្ហាដែលខ្ញុំចង់បញ្ជាក់កាន់តែច្បាស់ រីឯកិច្ចសន្ទនាមួយចំនួនក៏កើតចេញពីការរៀបរៀងថ្មីតាមការចងចាំ ពោលគឺខ្ញុំព្យាយាមរំឭកការចងចាំឱ្យអស់ពីសមត្ថភាពតែម្តង)។
នៅចុងបញ្ចប់នៃជំពួកនីមួយៗនិងនៅជំពួកចុងក្រោយ ខ្ញុំលើកឡើងនូវវិធីក្នុងការយកមេរៀនទៅអនុវត្ត ដោយប្រាប់អំពីវិធីសង្កេតផ្នត់គំនិតដែលកំពុងគូសវាសជីវិតរបស់អ្នក ដើម្បីឱ្យអ្នកដឹងថាតើវាប្រព្រឹត្តទៅដូចម្តេច និងថាតើត្រូវធ្វើដូចម្តេចបើអ្នកចង់ផ្លាស់ប្តូរវា។
ខ្ញុំសូមយកឱកាសនេះថ្លែងអំណរគុណដល់គ្រប់គ្នា ដែលមានចំណែកជួយឲ្យការស្រាវជ្រាវ និងសៀវភៅមួយច្បាប់នេះកើតឡើង រួមទាំងបណ្តាសិស្សដែលធ្វើឲ្យអាជីពអ្នកស្រាវជ្រាវរបស់ខ្ញុំពោរពេញដោយសេចក្តីសុខ។ ខ្ញុំសង្ឃឹមថាពួកគេនឹងបានរៀនសូត្រពីខ្ញុំ ដូចដែលខ្ញុំបានរៀនសូត្រពីពួកគេដែរ។ ខ្ញុំសូមថ្លែងអំណរគុណដល់បណ្តាអង្គការដែលគាំទ្រការស្រាវជ្រាវ ដូចជាមូលនិធិវិល្លៀមធី. ក្រេនត៍, មូលនិធិវិទ្យាសាស្រ្តជាតិ, ក្រសួងអប់រំ, វិទ្យាស្ថានជាតិសុខភាពចិត្ត, វិទ្យាស្ថានជាតិសុខភាពកុមារនិងការអភិវឌ្ឍមនុស្ស ព្រមទាំងមូលនិធិ ស្ពេនស៊៍រ។
ក្រៅពីនេះនៅមានក្រុមការងាររបស់ក្រុមរោងពុម្ពរេនដូម ហៅស៍ ដែលនៅចាំជួយទំនុកបម្រុងយ៉ាងល្អទាំង រេបស្ទ័រ យោនស៍, ដេនៀល មេណាគ័រ, ថម ភ័ររី, ជាពិសេសគឺ ខេរ៉ូឡាញន៍ ស័តតាន់ ជាបណ្តាធិការរបស់ខ្ញុំ។ ភាពរំភើបរីករាយនិងការណែនាំដ៏វិសេសរបស់អ្នកទាំងអស់គ្នាបានជួយធ្វើឲ្យសៀវភៅច្បាប់នេះកាន់តែល្អប្រសើរឡើងហួសពីការស្មាន ហើយសូមថ្លែងអំណរគុណដល់ ជិលស៍ អិនដឺសាន់ ជាតំណាងដ៏វិសេសរបស់ខ្ញុំ រួមទាំងហីឌី ហ្រ្កេនត៍ ជាអ្នកណែនាំឲ្យខ្ញុំបានស្គាល់ពួកគេ។
អរគុណគ្រប់គ្នាដែលផ្តល់ព័ត៌មាននិងមតិរិះគន់ ហើយដែលត្រូវអរគុណជាពិសេសគឺ ផូលលី ស៊ូលមេន, រីឆាដ ដ្វេក, រួមទាំង មេរីយ៉ាន ផេស្គីន ចំពោះយោបល់ដែលមានលក្ខណៈទូលំទូលាយនិងជាក់លាក់។ ជាទីបញ្ចប់ ខ្ញុំសូមថ្លែងអំណរគុណ ដេវិដ ស្វាមីរបស់ខ្ញុំ ចំពោះក្តីស្រឡាញ់និងក្តីរីករាយដែលធ្វើឲ្យជីវិតខ្ញុំមានភាពស្រស់បំព្រង។ កម្លាំងចិត្តដែលខ្ញុំបានទទួលពីគាត់នៅក្នុងអំឡុងពេលនិពន្ធសៀវភៅមួយច្បាប់នេះ ចាត់ទុកជាវត្ថុដ៏វិសេសវិសាលខ្លាំងណាស់។
ស្នាដៃរបស់ខ្ញុំជាប់ទាក់ទងនឹងភាពរីកចម្រើន ហើយវាក៏ជួយឲ្យខ្ញុំកាន់តែរីកចម្រើន ហេតុនេះហើយទើបខ្ញុំសង្ឃឹមថា វានឹងជួយឲ្យអ្នកទាំងអស់គ្នាបានរីកចម្រើនដូចគ្នា។
Mindset (n): a set of belief or a way of thinking that determines one's behavior , outlook and mental attitude.
ផ្នត់គំនិត (ន) : ជាសំណុំនៃជំនឿ ឬជាទំនោរនៃការគិតដែលមានឥទ្ធិពលកំណត់ទៅលើការប្រព្រឹត្ត ឥរិយាបថ និងទស្សនៈវិស័យ។
